ČA JE OSTALO OD LETA

od leta su ostali bijeli lancuni

postelja od jednie pršuone

stuari ventilator

pištanje kamiona za smeće

i mamurna jutra

od leta su ostale plastične čaše

luahti naslonjeni na šank i

pijana jutra

u letu je lebdila jedna mogućnost

lagano i prozračno na meštrualu

ko lancuni

bilo je vrime za

htila san

ali nisan.

iako je bilo vrime za

i htila san

ali

nis mogla

nis mogla

totalno je bilo vrime za

ti si reka amo ća

jua san rekla čekaj

pomalo

a totalno je bilo vrime za

pro

puštila

san

od leta su ostale dvi napuhane gluave

i jedna neispunjena želja

ono ča nas je prvi dan spojilo

je otežalo, se smočilo

je promočilo

je nestalo.

i sa

ka je zajužinalo,

zadažilo, zapuhalo

ti si reka

oćeš sa

a jua san rekla