KAMARA

Ti si reka di si a jua san rekla ovo san i šćegla. sakrila san se iza ormuara a ti si me iskua po sobi. nis ti se tila pokuazati. ti si me iskua i iskua ali jua sa se pretvorila u lancun pa u ormuar pa u špeć. ka si pogljeda u mene od muke san se pretvorila u zastor. 

ti si prekrienu sobu da me nuajdeš ali nišće od tuoga. tila san da ostaneš siditi na postelji dok me ne prestane biti sram. srce je bumbetalo samo je njega bilo čuti u sobi. ti si ga ču pa si se poče okrićati i  prekrićati kušini, lancuni, butide....a meni je bilo lipo ko da mene prekrićeš. zavuka si se ispo postelje točno ka san jua šmugla. špijala san te iz lustera (ipak jua svoju kamaru poznivun). lega si na postelju jer ti se više ni dualo igrati na hranjivalovice pa si me naglas zazva.
izuajdi, reka si. ajde izuajdi ka si me zvuala da duojdin. ležala san ispo postelje, točno ispo tebe. ajme kako mi je lipo bilo. mučala san. ti si znua da san neder u sobi. jope si reka, izuajdi. a jua se nisan ni pomaknula. još malo...još samo malo ostani, molila san u sebi. znala san da ćeš se svaki čas dignuti i puojti ća. pokri si se sa mojin lancunun sve do grla.
daj prestani, izuajdi, čula san ti gluas. htila san reći evo me ali riči nisu izlazile. ti si reka, puojću ća. tila san zaključati vruata da ostaneš zauvik ležati u mojuoj postelji.
ali nis.