Pup!

zaljubila san se po prvi put u životu i muogu reći da ni lako, bar meni ni lako jer meni je sve uvik tieško, tako san poštimana, nika nis bila lagana, pa me i to zaljubljivanje, uz puar prigodnih letova u zrak, stisnulo na ziemlju pa san morala ležati s uhun naslonjenin na parket i to je to, ne znun ča bi još u vezi tuoga rekla. zima je pri kraju. smuokve su počele živiti. izduklec izuajdu oni pupići, ma izduklec, iz onih sivih gruan bez sutra? pa unda nuaj muali prč na svakoj gruani - a svake godine zacimentaju se i ne moreš da ne misliš, gotova je, mrtva je, nema je više. i svake godine jope propupaju, ko neko čudo, iz ničega nešto. smuokve su počele živiti, ili su zapravo cijelo vrime žive samo izgljedaju mrtve, i jua to uzmin ko face value, i unda se sve nešto iščuđivun ka propupaju, ko da se čudo dogodilo, ko da me nešto trglo iz tufinja, ajme žive su, a jua san mislila da su mrtve. čini se da one to tako lako, pup, i eto pupa, a jua ležin sa uhun naslonjenin na parket i ne muogu se pomaknuti. da se razumimo, tila sa jua poletiti sa svoga balkona ali ni hodilo, imun previše kili, i to fizički i metafizički. duoj ću valja i jua jednuoga dana do 'pup' ali do tuoga treba duojti, pa nis valja pametnija od jednie smuokve.

u zuadnje vrime grčevito slušun, slušun ko da nika ništa nis slušala, držin se za slušanje. sve – i buru kako huče po guornjin stanu, i galebove kako kriču, ma čak i kako kružu. pa unda i onuaj teta val u svojuoj gluavi, hilticu kako siluje zid, pa televiziju na duonjin katu, babu i tetu vidu kako škaljaju rano sjutra, pa muziku, ali od note do note; ljude, ča govoru i  kako govoru, pa svoji koraci, svoje cipele kako šlapaju, pa rampu kako se spušta, brodski motuor, tipke, pa zvuk kazaljki ručnog sata. jer struah miga, come to papa. ma ni baš sve to tako, malo me i jie struah, ali ni stalno. pružun pipci u svit (pup?), sve samo da ne morun ležati s uhun naslonjenin na parket, samo ne to, to ne.

nego, ča san tila reći, aha, ovie zimie san se po prvi put zaljubila i muogu reći da ni lako. to govorin naravno ko čovik kuomu ništa ni lako. zaljubila san se i to stvarno ni imalo veze sa smuokvama, ali sada pokušuavun ne ležati na tlohu sa uhun prilipljenin za parket pa san izašla iz kuće i vidila te smuokve; pokušuavun ostati začuđena jer pjesnici su čuđenje u svijetu. jer carpe diem. jer je živuot čudo, treba svaki dan osvištuavati koliko čudo je živuot. zapravo bi nuajbolje bilo da na svaku stvuar puočnin otvarati usta ko riba i vikati a! pa ću valja unda bolje iskoristiti dan; tila sa reći, možda da prvo viknin a! pa se unda začudin, znun da bi trebalo iznaopak ali ča ka mi ne grie.

enivej, ne muogu po cijele dane ležati na tlohu sa uhun prilipljenin na parket, pa unda se dignin, respektabilno, dignin se, obučin se, nekad bolje nekad gore. operin kosu nekad, ne baš svaki dan, ni svaki drugi, možda svaki tre-ajde četvrti dan, i tako, tuširun se isto nekad. samo tieško mi bude ka se tuširun. ko da mi nešto fali, ili je nečega previše. nekako oduahnin ka je gotovo, i ćapun se šugamuana pa se nabrzinu uvučin u robu. ne znun. ali hej! sve da ostanemo čisti, je li.

ma sve je to dobro, i sve će to pruojti, i sutra je novi dan, i vrime liči sve rane, i sve prolazi, i panta rei, i sutra je novi dan, i malo pomalo, i korak po korak, i dan po dan, i što te ne ubije ojača te, i sve što je dobro kratko traje, i ko pod drugim jamu kopa sam pada u nju i pokrij se koliko ti bilj zapovida i moluaj ka uzalj duojde. moluaj. a jua stišćin i držin se grčevito za svaki zvuk.

ma dobro, nis nika ležala na tlohu sa uhun prilipljenin za parket, to se tako rečie. glupo je reći nis se tila dignuti iz postelje, glupo je reći i glupo je napisati. glupo je reći, ni mi se dualo dignuti. pa dobro, zaljubila san se, nis ni prva ni zuadnja, i ne žalin zbog toga, samo san evo tila usporiediti sebe i smuokvu iako znun da nema baš usporedbe, ali evo nas jedna do druge, ma ne znun zuač smuokva, jer san nju prvu vidila ka san izašla iz kuće. je li to? daleko od tuoga da me smuokva inspirirala za analogije, iako moglo bi se,  agropsihologija, tajni procesi duše / biljke koji dovode do pupa / rascvata duševnih procesa - ali lagala bi, ni to tako bilo, uopće - možda jer san tila nešto reći o zaljubljivanju, a u isto vrime i nisan.

 .big-preview{ display: none !important; }

 

 

 

.big-preview{ display: none !important; }